Nag-epekto na alas-11:59 kagab-i ang pagsirado sang border sang ciudad sang Bacolod sa mga taga-Iloilo City, Iloilo Province, bug-os nga Panay island kag Guimaras.
Nahibaluan nga kahapon gin-anunsyar ni Iloilo City Mayor Jerry Treñas kag Iloilo Governor Arthur “Toto” Defensor Jr. nga maga-sirado man sila sang border subong nga adlaw.
Nagsunod man diri si Bacolod City Mayor Evelio “Bing” Leonardia paagi sa announcement sa social media.
Apang kadungan sini gin-athag ni Leonardia nga wala nagakahulugan nga nagdamo ang COVID-19 cases sa Riverside Medical Center bangud sa nangin statement sang amo nga ospital sang nagligad nga Hulyo 20 kun sa diin ila ginpahayag nga nagdangat na sa full capacity ang isolation beds nga gin-designar para sa mga COVID-19 patients.
Suno kay Leonardia, ang iban nga mga kwarto ukon beds sa amo nga ospital ang ginagamit man sang mga health workers bilang quarantine center nga kabahin sang ila preventive measures.
Suno diri, luyag niya lamang athagon ang amo nga pahayag nga nagtuga sang kahangawa sa publiko.
Dugang pa ni Leonardia nga may nakalab-ot sa iya nga balita nga ang desisyon sang Iloilo City nga magsirado sang border para sa mga taga-Bacolod, Negros Occidental kag Negros Oriental ang kasunod sang amo nga statement.
Suno sa alkalde, halos pareho man lang ang numero sang mga kaso sa Bacolod City kag Iloilo City.
Gin-athag man sini nga ang iya pagdesisyon nga isirado man ang borders sumugod alas-11:59 kagab-i ang bilang reciprocity sa nangin pahayag ni Iloilo City Mayor Jerry Treñas.
Samtang, nagpagwa man sang paathag ang Riverside Medical Center kagab-i.
Suno sa tagdumalahan sang ospital, may yara lamang sang 11 ka mga beds sa ila nga isolation facility.
Walo diri ang gina-okupar sang COVID-19 positive patients nga may mild symptoms samtang ang tatlo naman ang okupado sang probable patients.
Magluwas diri, may yara man sang walo ka mga suspected kag probable patients nga naka-admit sa sagwa sang isolation facility apang nahamtang gihapon sa COVID-19 area sa 5th floor sang ospital.
