Ginkumpirmar ni Negros Occidental Governor Eugenio Jose “Bong” Lacson nga nabuksan na ang border sang Negros Occidental kag Negros Oriental sumugod kahapon, Marso 15.
Suno kay Lacson, maga-epektibo na ang Resolution 101 sang National Inter-Agency Task Force ukon ang Uniform Travel Protocol kun sa diin wala na sang patigayunon nga RT-PCR testing, quarantine, igapakita nga medical certificate kag tarvel authority sa pagsulod sa probinsya.
Nahibaluan nga sang Sabado, nagpagwa naman sang Executive Order No. 21-18 series of 2021 nag naga-adoptar sa NIATF resolution 101.
Apang apisar sina, ginapaathag man ni Lacson nga may-ara gihapon sang dapat nga sundon.
Ini ang pagpresentar sang negatibo nga RT-PCR test result gikan sa place of origin nga nakua sa sulod sang 72 oras.
Samtang ang mga magabyahe naman nga gikan sa Region 6 ang indi na pangitaan sang RT-PCR test apang ang mga gikan sa gwa sang rehiyon ang kinahanglan nga magsunod diri.
Dugang pa sang gobernador nga dapat man magfill-out sang S-PASS ukon ang Safe, Swift kag Smart Passage Permits nag napirmahan gikan sa point of origin.
Ini naman ang pamaagi agud ma-inform ang mga local government unit (LGU) nga pagapulian sang mga pasahero inkaso nga kinahanglanon ang contact tracing.
Samtang paathag pa ni Lacson nga bangod kabahin ang Negros Oriental sa Region 7 ginpahayag sini nga antes pa man ang pagsakay sa bus, ipakita man dapat ang negatibo nga RT-PCR test.
Dugang pa nga paathag ni Lacson nga ang pagpatuman sang pagpakita sang RT-PCR test result ang pamaagi agud nga mapunggan ang pagsulod sang positibo nga kaso sang COVID-19 sa probinsya.
