Nagpatigayon sang pagsinapol ang Emergency Operations Center (EOC) Task Force upod ang mga BPO companies sa ciudad sang Bacolod sang nagligad nga Biyernes agud hambalan ang palaabuton nga Christmas celebrations.
Sa interview sang Bombo Radyo Bacolod kay City Administrator Em Legasp-Ang, ginpahayag sini nga nagapasalamat gid siya bangud halos tanan nga BPO companies nga naga-operate sa Bacolod ang nagtambong sa meeting.
Naghatag sila sang guidance kun paano iobserbar ang minimum public health standards sa Christmas holidays kag agud mapasiguro ang health kag safety sang tanan nga magapartisipar sa mga selebrasyon kag aktibidad.
Nahibaluan suno kay Ang nga ang mga Christmas parties sang BPO companies ang isa sa pinakadako nga selebrasyon kada tuig.
Suno sa iya, gina-abisuhan ang mga ini nga likawan lang anay ang pagpatigayon sang mass gatherings bangud sa kahangawa nga dala sang COVID-19 pandemic.
Dugang pa sang city administrator nga indi nila luyag nga sa imbukada sang tuig 2021, magasaka liwat ang kaso sang coronavirus sa ciudad bangud lamang sa pagpatigayon sang mga mass gatherings sini nga holiday season.
