Nagapanawagan ang Branch Director sang DA-PHILRICE NEGROS sa mga pumuluyo nga kaunon ang bugas nga ginabaligya nga nagikan sa National Food Authority bangud maayo ang kalidad sini.
Sa interview sang Bombo Radyo Bacolod kay Director Ommal H. Abdulkadil, personal ini nga makatestigo nga ang bugas nga nagikan sa NFA kag ginabaligya sang P20 kada kilo ang indi mabaho kag malain nga klase sang bugas.
Suno kay Abdulkadil, dapat magmove on na ang mga pumuluyo bangud ang ginabakal sang NFA nga humay ang nagikan sa mga mangunguma mismo sang pungsod kag maayo na ini nga variety sang palay bangud sila mismo sa PHILRICE ang naghatag sang variety.
Suno diri, ang nasambit nga bugas ang mahumot kag manami kaunon.
Suno diri ang kada variety sang palay ang may ikasarang sa produksyon kaangay lamang sang RC222 nga variety ang medyo matig-a lamang sa tion nga magbahaw apang ini ang may madam nga produksyon.
Samtang, gin-athag man sini nga ang P20 kada kilo nga bugas ang original price sini ang P40 kada kilo apang ginsubsidize sang gobyerno agud nga mabuligan ang mga indigents, senior citizens, persons with disabilities, kag solo parents.
Indi man malipod nga manami kun lantawon ang imported nga bugas apang daw indi man gid maayo ang kalidad gani ginapanawagan sini nga magbakal sang locally produced nga bugas agud nga mabuligan man ang mga mangunguma sang pungsod.
Samtang ginpahayag man sini nga indi man mahimo nga pauntaton ang importasyon sang bugas bangud wala pa nag-100 percent ang food security sa pungsod kag ang taripa nga makuha diri amo ang ginabakal sang binhi kag makinarya agud libre nga mahatag sa mga mangunguma.
Sa pihak nga bahin, madasig man ang pagproduce sang PHILRICE sang mga varieties sang palay bilang preparasyon sa climate change.
