BACOLOD CITY — Tatlo ka brand new nga mga salakyan nga wala sang OR-CR ang ginpangdakop sang Land Transportation Office ukon LTO Bacolod samtang nagapatigayon sang operasyon batok sa mga nagalapas sa Anti-Distracted Driving Act ukon ADDA.
Sa interview sang Bombo Radyo kay LTO Bacolod Head Renato Novero, nahisayran nga wala sa gihapon sang may nadakpan nga violators sang ADDA bangud mahapos lamang likawan sang mga drivers ang mga enforcers sang ahensya sa tion nga makita nila ini sa higad sang dalan.
Apang tatlo naman ka mga brand new nga salakyan sang Toyota nga nagabyahe nga wala sang OR-CR ang gindakop sang LTO kag natalana nga multahan sang 100 mil pesos kada isa.
Wala gin-impound ang mga salakyan bangud wala sang lugar sa LTO compound apang ginpadal-an ang car dealer sang notice agud nga ila mabayaran ang multa santo sa desisyon sang Traffic Adjudication Service sang ahensya.
Igarekomendar man ni Novero nga irevoke na ang accreditation sang kumpaniya bangud makapila na ka beses nga wala ini nagsunod sa layi bisan masami man sila nga ginapadal-an sang abiso.
Kadungan sini, ginklaro ni Novero nga lain man ang dakpanay sa mga salakyan nga wala sang OR-CR sangsa mga naga-operate sang colorum.
Ini bangud kinahanglan gid pamatud-an nga colorum ang operasyon sang mga salakyan ilabi na kun kaisa nagapangita sang balibad ang driver kag makalusot sa LTO.
