Isa ka bangkay nga ginapatihan babayi ang nasapwan sa Sofia Gonzaga Avenue, Barangay Estefania, Bacolod City subong nga hapon.
Ang lugar kun sa diin nasapwan ang bangkay sang babayi ang malapit sa Romanito P. Maravilla Sr. National High School.
Sa interview sang Bombo Radyo Bacolod kay Elmo Villa, residente sang Barangay Concepcion, Talisay City, nagapamasura kag nakakita sang bangkay, samtang nagapanipon sila sang basura sang iya anak may nakita sila sa idalom sang isa ka puno ang bangkay nga nagakaya apang halos indi naman ini makilal-an bangud nga bagul nalang ang nabilin sa ulo sini.
Interview clip with Elmo Villa ang nakakita sang bangkay/skeleton
Suno sa nakakita, nagapati ini nga babayi ang bangkay bangud sa bulto sang dughan sini.
Gilayon man nila ini nga gin-report sa Barangay kag ginkadtuan man sang mga kapulisan sang Bacolod Police Station 4.
Suno kay Elmo, ang bayo sang biktima ang guray-guray ukon stripe.
Sa pagbanta sini, yara sa 30 anyos ang babayi.
Sa karun, padayon ang imbestigastyon sang mga kapulisan agud matumod ang identity sang bangkay.
Samtang, ginpahayag naman sang station commander sang Bacolod Police Station 4, ang bangkay ang nasapwan sa higad sang dalan padulong sa Country Homes kag isa ka eskwelahan.
Interview clip with Police Major Elmer Bonilla, station commander sang Bacolod Police Station 4
Suno kay Bonilla, pasado ala 1:00 ang takna subong nga hapon nagtawag sa Barangay ang grupo sang mga scrapper nga may Nakita nga skeleton sang tawo samtang nagapang-ukay sang basura sa area.
Ang Barangay ang gilayon man nga nagtawag sa Police Station agud nga magpahibalo nga may yara sang nasapwan nga tul-an sang tawo sa lugar nga gilayon man nga ginrespondehan sang mga kapulisan kag ginpa-follow -up sa operatiba sang Scene of the Crime Operation (SOCO) agud maproseso ang crime scene.
Suno kay Bonilla, sa pagpangusisa nila sa lugar ginpahayag sang mga residente nga duha na ka semana ang nakaligad may yara ang mga ini sang napanimahuan nga indi maayo nga baho.
Suno diri, gindumdom sang mga tawo nga mga sapat lamang ini nga napatay.
Ang nasapwan nga skeleton nga ginapatihan nga babayi ang may yara sang sling bag nga may unod nga bayo kag mga underwear kasubong man ang lighter kag flashlight.
Sa karun padayon pa ang imbestigasyon sang kapulisan agud nga matumod ang identity sang bangkay kasubong man ang rason sang kamatayon sini.
para sa dugang nga detalye: https://www.youtube.com/live/G9Myvul_-Lk?si=LsgVQZv3YPcgsTNh
