Ginpahayag sang legal counsel sang Bacolod Real Estate Development Corp. (BREDCO) nga nagapreparar man sila sang ila nga sulat agud nga ipasa sa opisina sang bise alkalde sang ciudad agud nga ipahayag man ang ila point of view angot sa pagpamatok sang ALMANA Property and Development Corp. (APDC) sa ginapangayo nga Resolution of No Objection.
Ang RONO ang para sa ginapangayo nga dugang nga 25 hectares nga igareclaim sang BREDCO para sa port maintenance ukon sa replanning kag re-engineering sang port.
Sa interview sang Bombo Radyo Bacolod kay Atty. Joselito Bayatan, ang ginbaklan sang APDC sang property ang Bacolod Coastal Ventures Corp. (BCVC) kag ang kumpaniya ang indi BREDCO.
Suno kay Bayatan ang BREDCO kag BCVC ang magkatuhay nga corporate entities.
Suno diri, indi ma-apply sa BREDCO ang nakabutang sa agreement sang Bacolod Coastal Ventures Corp. (BCVC) kag sang APDC bangud lain ang duha ka korporasyon.
Gin-athag man sini nga bisan pareho nga personalidad ang nagadumala sa duha ka korporasyon, wala ini nagadula sang realidad nga lainanay ang duha ka kumpaniya.
Wala man ini nakahibalo kun paano ang bayranay sang APDC kag BCVC kun sa diin ginpahayag sang legal counsel sang Almana nga ang P45 million nga initial nga ginpabayad sang nasambit nga korporasyon sa Bacolod Coastal ang gingamit sa BREDCO apang ang maathag diri nga lain ang BCVC sa BREDCO.
Suno kay Bayatan, wala man nakahibalo ang BREDCO nga may yara sang unsolicited proposal ang ALMANA sang nagpadala ang mga ini sang requests para sa RONO para sa dugang nga 25 hectares nga ireclaim bangud wala man sila sang labot sa operasyon sang nasambit nga korporasyon.
Nagpanindugan man ini nga santo sa nakasaad sa nagaexister nga Comprehensive Revised Reclamation Agreement (CRRA), ang BREDCO ang ginapahanugutan nga mag-expand para sa port operation.
Gani ginapahibalo sini ang opisina sang alkalde nga ginforward man sa SP nga ang nasambit nga port operation ang permissible sa idalom sang Comprehensive Revised Reclamation Agreement (CRRA).
Ginpahayag man sini nga kun mapahanugutan kag matapos na ang pagreclaim sang dugang nga 25 hectares dako ang mabulig sini sa vision sang alkalde sang ciudad sang Bacolod nga mangin super city ang ciudad sang Bacolod bangud madamo sang investors nga magasulod sa ciudad kasubong man ang mahatagan sang trabaho.
