Ginkumpirmar sang manager sang Bredco port sa ciudad sang Bacolod nga wala pa sila naga-cater sang mga regular passengers nga luyag magbiyahe.
Sa interview sang Bombo Radyo Bacolod kay Josephine Solis, ang mga repatriated overseas Filipino workers (OFWs), locally stranded individuals (LSIs) kag mga authorized persons outside residence (APOR) lamang nga nagikan kag padulong sa Manila, Iloilo kag Cagayan ang ila nga na-cater.
Paathag sini, nagahulat pa sila sang direktiba nagikan sa mga fastcraft operators nga maresume na ang mga ini sa pagbiyahe.
Nahibaluan nga una na ginpahayag sang mga shipping companies nga ginahulat pa man nila ang guidelines nga ipagwa nanday Bacolod City Mayor Evelio “Bing” Leonardia kag Iloilo City Mayor Jerry Treñas angot sa pagbalik sang commercial sea travel.
Suno kay Solis, wala pa nakapatunda sa ila ang mga tag-iya sang fastcraft kun san-o ang mga ini maresume sang operasyon.
Samtang, ginpasiguro naman sini nga nakahanda na ang Bredco port sa pagbaton sang mga regular passengers.
Istrikto man nila nga ginapatuman ang standard health protocol sa pantalan.
Samtang, ginpahibalo kag gin-klaro naman ni Leonardia kay MARINA-6 Regional Director Jose Venancio Vero Jr. nga unhampered kag hilway na nga makabiyahe ang mga pasahero nga magapadulong Bacolod-Iloilo vice versa.
Naghinun-anon man ang alkalde kay Dwight Carbon sang Weesam Express angot sa unhampered travel nga nakasaad sa Executive Order No. 43 nga gin-issue sini nagligad nga Hunyo 15.
Nagpasalig naman si Carbon nga I-relay niya ang impormasyon sa iban pa nga mga fastcraft operators.
