Ginpapreparar na sang Office of the Civil Defense – Negros Island Region ang Barangay Biak-na-Bato sa banwa sang La Castellana para sa pagpatigayon sang preemptive evacuation sa posibilidad sang pagluntad sang lahar flow bangod sa Bagyo TINO.
Sa interview sang Bombo Radyo Bacolod kay OCD-NIR Director Donato Sermeno III, nagsulod sa Philippine Area of Responsibility alas-8:00 kahapon sang aga ang Bagyo kag ini ang nagsanyog sa severe tropical storm category alas-3:00 kaina sang kaagahon.
Ginalauman nga bwas pa mabatyagan ang epekto sini sa Negros Island Region.
Kahapon magapatigayon kuntani sila sang pre-disaster meeting, apang ini ang nakanselar kag nadesisyonan nga karun nalang sa hapon patigayunon.
Ginaseguro naman nila ang pagkapreparado sang mga ahensya sang gobyerno nga involved sa disaster response.
Suno kay Sermeno, nagkanselar na sang byahe sang barko sa Dumangas-Bacolod kasubong man ang Siquijor-Dumaguete.
Kahapon palang, nag-abiso na ang mga ini sa opisyales sang Brgy BiaknaBato sa banwa sang La Castellana nga magpreparar sa pagpatigayon sang preemptive evacuation bangod sa posibilidad sang pagluntad sang lahar flow.
Nagapreparar naman ang La Castellana Municipal Disaster Risk Reduction and Management Office inkaso kinahanglanon ang ila augmentation.
