Ginhatag na sa 61 ka mga Barangay sa Bacolod ang P200,000 financial grant sang Office of the President sa idalom sang Bawat Barangay Makikinabang (BBM) Program.
P100,000 diri ang magakadto sa project sang Barangay, samtang ang P100,000 ang para naman sa lima nga mapilian nga Presidential scholar nga magabatun sang tig-P20,000.
Naghatag man sang speech si Bacolod City Mayor Greg Gasataya, nga liwat nagpahanumdom sa pagsunod sa guidelines.
Sa interview sang Bombo Radyo Bacolod kay Punong Barangay Jerry Tingson sang Brgy Estefania, ginmando sini sa ila Purok Chairman nga pangitaon ang pinakapigado nga graduating student.
Apang aminado ini nga indi tanan nga purok mahimo kuhaan, gani ginsala na lamang nila ang mga ginsumiter nga pangalan sa pagpangita sang nagakinahanglan gid sang bulig.
Nagpanguna diri ang graduating student nga kabulig sa balay.
Pahayag sini nga ginpili nila nga kuhaan sang benepisyaryo ang mga bahin sang Brgy Estefania nga makit-an gid ang pigado nga kahimtangan sang mga pumuluyo.
Ang pagpili ang ginpaagi man nila sa Barangay Council kag ginpaboran sang mayorya paagi sa resolusyon.
Hugot nga ginatindugan ni Tingson nga husto ang ila proseso.
Aminado ini nga may naggwa nga mga postings nga kalakip sa nakabatun ang pakaisa sang chairman sang Sangguniang Kabataan nga iya naman ginpanginwala.
Suno kay Tingson, wala na lamang nila ginasapak ang pagpangguba sang gintawag sini nga ”troll account.”
