Nagapanguna gihapon ang Barangay Estefania sa may pinakamadamo nga kaso sang dengue sa ciudad sang Bacolod subong nga tuig.
Santo sa rekord sang Bacolod City Health Office, naglab-ot sa 56 ang suspected dengue cases sa Barangay Estefania.
Ini ang ginasundan sang Barangay Tangub nga may 35; kag pangatlo ang Barangay Pahanocoy kag Taculing nga may tag-31.
Ang Barangay Granada ang may yara sang 30 cases.
Sa interview sang Bombo Radyo kay Punong Barangay Jerry Tingson, dapat nga ma-involve gid ang mga pumuluyo sa paglimpyo sa palibot sang barangay agud indi magdamo ang mga pasyente sang dengue.
Suno kay Tingson, indi masarangan sang barangay ang paglimpyo kun wala ang bulig sang mga residente sa madamo nga mga purok kag 37 ka subdivision sa Estefania.
Ang barangay ang may yara sang fogging machine kag sang damlag lang, may ginpatigayon nga fogging operation sa East Homes II kag iban pa nga bahin sang barangay.
Naghingyo man ini sa mga eskwelahan nga ireport gilayon sa barangay officials kun kinahanglan ang fogging operation agud marespondehan.
Samtang, ginatumod pa kun sa diin nakuha sang duha ka tuig nga babayi sa Barangay Granada ang dengue virus nga nagresulta sa iya kamatayon.
Sa interview sang Bombo Radyo kay Armando Vito, administrative officer sang Barangay Granada, indi permanente sa ila barangay ang ginikanan kag lola sang bata bangud kun kaisa, nagakadto man ang mga ini sa Doña Juliana Subdivision sa Barangay Taculing.
Aminado si Vito nga makakilibot ang pagkapatay sang bata bangud sa dengue bangud wala ini nakitaan sang sintomas antes gindala sa ospital.
Ang biktima ang subang nga bata sang mag-asawa apang wala na ginhingadlan ang mga ini.
Kadungan sini, nagpanawagan si Vito sa mga pumuluyo sa Barangay Granada nga magpanglimpyo gid sa palibot sang balay agud malikawan ang pagdamo sang lamok nga nagadala sang dengue.
Antes ang tig-ululan suno kay Vito, nagpatigayon naman sila sang declogging operations sa mga kanal.
Suno diri, mas maayo gid ang regular nga pagpanglimpyo sa panimalay bangud temporaryo lamang ang epekto sang fogging operation.
