Tuman ang kalipay sang Punong Barangay sang Barangay Granada, Bacolod City kag choreographer sang Masskara dancers sang Barangay Granada matapos nga nangin Grand Slam champion sa Street Dance and Arena Competition sa Masskara Festival 2024.
Sa interview sang Bombo Radyo Bacolod kay Punong Barangay Armando Vito, nagapasalamat ini sa tanan nga nagbulig kag nagsuporta sa Barangay Granada.
Suno kay Vito, nalipay ini nga nakuha gid nila ang ila nga ginpreparahan.
Pahayag sini nga tatlo ka bulan nga nagpractice ang dancers kag nagpreparar ang Barangay Granada para sa ila nga performance sa Street Dance and Arena Competition.
Gani ginakalipay niya nga nalabawan pa nila ang performance sang nakaligad nga tuig kag sila ang liwat nga nangin Grand winner.
Suno kay Vito, wala sila nagapaminsar nga kasumpong nila ang iban nga Barangay kundi mismo ang ila nga mga kaugalingon mismo.
Liwat sini ginpasalamatan sa tanan nga mga pumuluyo sang Barangay Granada, mga opisyales sang Barangay, opisyales sang ciudad kag tanan nga nagsuporta sa ila.
Dugang pa sini nga ang tanan nga sakripisyo kag kabudlayan nga ila gin-agyan sa pagpreparar sang ila nga performance ang nagbunga gid man kag luyag sini ipakita nga ang Masskara dancers ang indi lang para sa barangay kundi para man sa International.
Naghakot man sang special awards ang Barangay Granada.
Ini ang ginalakipan sang Best in Music; Best Theme and Concept kag Best in Mask and Costume.
Ang Barangay Granada ang makabaton sang P25,000 sa kada special award.
Nakuha man sang Barangay Granada ang Bacolod Yuhum Foundation Choice award kag nakabatun sang P15,000.
Sila ang makabaton man sang P100,000 nagikan sa sponsor.
Bangud sini back to back champion naman ang Barangay Granada nga makabaton sang P1 million.
Ang Barangay Bata ang first runner-up nga makabaton sang P500,000 kag Barangay 12 ang second runner-up nga makabaton sang P300,000.
