Mangin ang barangay hall sang Barangay 22 sa ciudad sang Bacolod ang wala nakaluwas sa demolition sa mga illegal structures nga nagatindog sa sidewalk, santo sa mandu sang Department of the Interior and Local Government.
Miyerkules nga adlaw, ginsuguran sang mga barangay officials sang Barangay 22 ang pagdemolish sa ila barangay hall nga nagatindog sa higad sang dalan.
Sa interview sang Bombo Radyo kay Punong Barangay Diosdado Mayo, kinahanglan nila nga gub-on ang barangay hall bangud ginasukmatan sila sang mga residente nga ginamanduan nga mangdemolish nga wala pa naguba ang barangay hall nga isa man ka illegal structure.
Ang barangay hall ang ginalakipan sang container van nga ginpahulam sa ila sadto sang City Engineer’s Office kag ginbutangan lang sang palayas.
Pito ka tuig ang nakaligad sang ginpatindog ang barangay hall sang Barangay 22 kag bangud wala sang bakante nga lote sa lugar suno kay Mayo, napilitan sila nga ibutang ini sa sidewalk bisan nakahibalo nga ini ang iligal.
Subong nga ginmandu ni Presidente Rodrigo Duterte kag sang DILG ang demolition suno sa punong barangay, wala sila sang liwan nga mahimo kundi ini ang gub-on bisan wala sila sang sayluhan.
Huwebes sang udto, ginhatagan ni Congressman Greg Gasataya sang canopy ang Barangay 22 nga amo ang ila gingamit bilang temporaryo nga barangay hall samtang wala pa sang lote nga sayluhan sang container van.
Suno kay Mayo, kun wala sila sang sayluhan sang container van, ibalik nalang ini sa City Engineer’s Office.
