Blangko gihapon ang Talisay City Police Station kun sin-o ang nagpatay sa 33 anyos nga lalaki sa sulod sang ginamaneho niya nga van sa Hacienda Manaol, Barangay Matab-ang, Talisay City kahapon sang kaagahon.
Suno kay Police Lt. Abegael Donasco, tagpamaba sang Talisay City Police Station, wala pa sang natumod nga motibo sa pagpatay kay Brian Mark Agillo, 33-anyos, may live-in partner kag tatlo ka mga kabataan kag temporaryo nga nagapuyo sa Barangay 36, Bacolod City apang tumandok sang Barangay Inayawan, Cauayan.
Suno kay Donasco, ang biktima ang nagatrabaho sadto bilang call center agent antes pa man ini nagtrabaho bilang runner sang nagarent a car.
Ginpahayag man sini nga nagapadayon sila sa pagpangita sang lead nga makatudlo sa suspek nga nagpatay kay Agillo.
May yara man sang nakita nga basiyo sang bala sa van apang wala pa natumod kun ano nga armas luthang ang gingamit sa pagpatay sa biktima.
Samtang, indi man consistent ang pagrenta ni Agillo sang salakyan gikan sa tag-iya sang rent a car.
Suno kay Zaldy Mahinay, malaka lang man nagarenta sang salakyan ang biktima kag wala man ini nakahibalo kun sin-o ang marenta sini.
Suno diri, wala pa man gani siya nabayaran sang renta sang salakyan sang Miyerkules sang gab-i.
Suno kay Mahinay, nagatext lang ang biktima nga malisensya nga marenta sang salakyan kag ginakadtuan sa iya balay agud kuhaon kag si Agillo lang ang nakahibalo kun sin-o ang magarenta sang salakyan.
Suno kay Mahinay, sa Bacolod lamang ang nahibaluan sini nga ginadal-an sang biktima sang salakyan apang kun lain-lain ang driver, mahimo nga lain-lain man ang destinasyon.
Suno diri, subong lamang niya nahibaluan nga si Agillo ang ila man paryente.
Suno naman sa live-in partner ni Agillo nga si Sheena Espe, may kaistorya si Brian sa cellphone antes ini naglakat sang Miyerkules sang gab-i kag wala na nakapauli tubtub nabalitaan niya ang natabo kahapon sang kaagahon.
Aminado naman si Espe nga nakapanugid si Brian sa iya nga tiya nga may patong ini sa ulo apang indi niya matumod kun para sa ano ang patong.
Suno kay Espe, wala siya sang ideya nga may kaaway si Brian kag wala man ini sang involvement sa illegal nga druga.
