Aminado ang pinuno sang Bacolod Traffic Authority Office nga nabutang ini sa tunga-tunga sang Sabado matapos nga wala nasunod ang ginkasugtan nga one lane ang siraduhon sa ginakaayo nga taytay malapit sa Bangga Cory kag Bangga Metal.
Sa interview sang Bombo Radyo Bacolod kay Police Major Junji Liba, sang Hwebes pa lang nagpanawag na ang contractor sang full closure sang nasambit nga area apang nag-insister ini nga indi sini mapasugtan bangud main road ini kag madamo sang volume sang salakyan ang nagaagi diri.
Suno kay Liba, ginhambalan sini ang contractor nga kun siraduhon sini ang dalan, pangayuan nalang nila sang approval sa Sangguniang Panlungsod.
Bangud sa pag-ayo sang contractor, ila nakasugtan nga isa ka lane lang ang siraduhon, kun sa diin ginplastaran man sang madamo nga traffic enforcers agud nga magmanage sang trapiko apang nabutang ang BTAO sa tunga-tunga matapos nga duha ka dalagko nga crane ang ila nga gingamit kag dako nga bahin sang dalan ang ila nga nasaklam.
Suno kay Liba, bangud delikado, wala man naagyan ang pihak nga lane kun sa diin nagtuga sang pagpugok sang traffic sa Bangga Cory padulong sa circumferential road.
Suno kay Liba, ginpanugyanan man sini ang contractor nga sa gab-i lamang kuntani magubra agud nga indi madamo ang salakyan apang madamo man ang mga ini sang alibi kag mga factors.
Gani, bisan nga naubos na sini padala ang mga enforcers, nagpugok gid ang dalagan sang trapiko.
Ginbalik man sini sa contractor ang natabo kag ginpanugyanan nga dapat ginplanuhan anay antes ang ila nga ginubra bangud tuman kadako nga bagay ini agud nga magiyahan ang publiko agud malikawan ang pagpugok sang trapiko.
Samtang, nagpanawagan man ini sa mga contractors nga indi paghimuon nga alibi ang ginmikskla na nga semento sa mixer sa paglapas sang truck ban.
