Ginlaragway ni Negros Occidental 5th District Representative Dino Yulo nga “explosive” ang hearing nga ginpatigayon sang Committee in Agri and Committee on Good Government tuhoy sa Sugar Order No. 3 kag 4 sang Martes.
Sa interview sang Bombo Radyo kay Yulo, ginpahayag sini nga pagkatapos sang malapit duha ka oras nga debate, ang briefing ang ginhimo na nga inquiry.
Suno diri, nagtambong sa inquiry sanday anay Sugar Regulatory Administrator Hermenegildo Serafica, anay Department of Agriculture Undersecretary Leocadio Sebastian, mga deputy administrators sang SRA, Bureau of Customs kag Department of Trade and Industry.
Ini ang nagsugod alas 9:00 sang aga kag natapos alas 3:00 sang hapon.
Suno sa kongresista, madamo sila sang mga butang nga nabukaran tuhoy sa Sugar Regulatory Administration kag madamo ang wala nahibaluan sang mga pumuluyo ilabi na sang mga stakeholders sang kalamay.
Suno sa iya, nasentro ang inquiry sa SRA sa SO3 kag SO4 partikular na sa panawagan nga may shortage sang kalamay apisar nga sang Agosto 17, nadiskubrehan nga madamo pa sang imported nga kalamay nga yara sa mga bodega sang mga importers.
Suno kay Yulo, may yara pa sang 125,000 metric tons ukon masobra 60 porsyento nga nabilin nga supply gani ila ginkwestyon kun ngaa ginadala ang SO4.
Aminado ini nga may yara sang paghugot sa supply bangud 76,000 metric tons kada bulan ang ginapartinisir para sa industrial kag consuming public kag apisar nga ang SO3 ang exclusive lamang sa industrial, nagasuspetso ang mga kongresista nga madamo sa gihapon sang leakages diri rason kun ngaa aktibo ang gobyerno sa pagvalidate kag pagtsekyar sa mga warehouses.
Dako naman nga butang para kay Yulo nga nakapungko ini bilang opisyal sang SRA sa sulod sang malapit lima ka tuig bangud iya nausar ang mga dynamics kag perspectives nga nakuha sini sa ahensya sa ginpatigayon nga inquiry.
Nagapanawagan ini sang transparency bangud sila ang nagapati nga may mga butang nga si Serafica kag Sebastian lamang ang nakahibalo.
