Padayunon ni Brigadier General Joey Escanillas ang mga programa nga nasuguran ni Major General Michael Samson sa pagpungko bilang panibag-o nga commander sang 3rd Infantry Division sang Philippine Army.
Ini matapos nga nagretiro na si Samson kahapon, kadungan sa iya nga kaadlawan.
Antes sa promotion, si Escanillas amo ang nagpungko nga Assistant Division Commander sang 3rd ID.
Si Escanillas ang natawo sa Alimodian, Iloilo, samtang sa iya first assignment, siya ang nadestino sa Davao Region sa kasagsagan pa sadto sang mga aktibidad sang Moro Islamic Liberation Front (MILF).
Siya ang sunod nga na-assign sa Northern Luzon, Central Luzon, Metro Manila, Southern Luzon, apang ang pinakamalawig amo ang sa Southern kag Central Visayas.
Sa iya pagpungko bilang 302nd Infantry Brigade Commander, siya man ang nagpanguna sa pagdismantle sang South West Front sang New People’s Army.
Suno kay Escanillas, padayunon niya ang mga programa ni Samson, kag i-imprubar ang makita nga kinahanglan sang improvement.
Padayunon man niya ang case build-ups, kag target sini nga ma-utod ang resourge generation sang makawala nga grupo.
Suno kay Escanillas, dapat matumod kun sin-o ang mga nagahatag sang suporta sa NPA agud ma-untat, samtang pasanyugon pa ang pagpressure sa combat operations.
Padayunon man nila ang koordinasyon sa mga local government units kag ahensya sang gobyerno agud mapasanyog ang local peace enggagements kag mapalab-ot ang mga programa sang gobyerno.
Luyag nila nga mapakita sa mga NPA nga indi kinahanglan nga mag-ilinaway, kag ang mga issues ang mas maayo nga estoryahan.
Nakapatigayon na ini sang initial conference, kag nakahatag naman sang iya marching order sa mga militar.
