Patigayunon na ang regional kick-off sang Brigada Eskwela sa Negros Island Region subong nga adlaw.
Sa interview sang Bombo Radyo Bacolod kay Almyr Dequinia, spokesperson sang Department of Education-Negros Island Region, ang klase ang magaumpisa sa Hunyo 8 apang antes pa man may patigayunon nga Brigada Eskwela.
Suno kay Dequinia, ang magahost sang regional kick-off para sa Negros Island Region amo ang Schools Division Office-Talisay City subong nga adlaw, Hunyo 1.
Suno diri, sa Brigada Eskwela masaksihan ang Bayanihan spirit sang mga Local Government Unit, nagkalain-lain nga government agencies, mga ginikanan kag iban pa nga mga stakeholders, bangud ini nga aktibidad ang pagpreparar sang eskwelahan para sa pagbukas sang klase sa Hunyo 8.
Ini man nga aktibidad ang pagpasiguro nga safe kag handa ang mga eskwelahan sa pagbalik sang mga kabataan para sa ila nga pagtuon.
Gin-athag man sini nga indi requirement sa mga ginikanan ukon bisan sin-o man nga makigbahin sa Brigada Eskwela ang pagdala sang floorwax, pinta ukon ano pa bangud ang ginapromote sang aktibidad amo ang bayanihan ukon pagbuligay sang tanan para sa malimpyo kag hilway nga pagbukas sang klase para sa School Year 2026-2027.
