Dako ang pagpasalamat sang school principal sang Mandalagan Elementary School matapos nga madamo ang nakigbahin sa ila nga Brigada Eskwela bilang preparasyon sa pagsugod sang klase sa Agosto 29 para sa School Year 2023-2024 matapos nga nagpanawagan sa Bombo Radyo Bacolod.
Sa interview sang Bombo Radyo Bacolod kay Leo Ceralbo, nakita sini nga madamo sang mga ginikanan ang nagpadulong sa eskwelahan agud nga magbulig sa paninlo facilities kadungan sang Brigada Semana.
Gindaya man sini ang gin-issue ni Education Secretary kag Vice President Sara Duterte nga DepEd Order No. 21, Series of 2023 ukon ang pagsulundan nga gina-implementar para sa Brigada Eskwela bangud nangin masana-aw ang mga classrooms.
Wala naman sang makakuha sang atensyon sang mga kabataan bangud wala na sang madamo nga nakatapik sa dingding sang classrooms.
98 porsyento naman sila nga nakahanda sa pagbukas sang klase kag sa Agosto 29, pormal na nga magaumpisa ang pagtudlo kag wala na sang pagpaninlo nga matabo.
Nagbutang man ang eskwelahan sang duha ka mga school guard agud nga maglibot sa tion sang gab-i kag masiguro nga indi makawatan bangud sa pigado man nga sitwasyon sa karun.
Nagpanawagan man ini sa mga ginikanan nga ipaenrol na ang ila mga kabataan kag sa Lunes tubtob sa Biyernes magabaton sila sang enrollees apisar nga nagapaidalom ang mga ini sang in service training.
