Wala na sang kabuhi sang nasapwan ang isa ka British National sa atubang sang isa ka sari sari store sa Purok Katilingban, Barangay Salong, Kabankalan City, Negros Occidental kahapon sang aga.
Ginkilala ang biktima kay Alyas Adrian, 64-anyos ang temporaryo nga nagapuyo sang Barangay Hall sang Barangay Salong, Kabankalan City.Santo sa inisyal nga imbestigasyon sang Kabankalan City Police Station, ginpahayag ni Alyas Marlon, 64 anyos, kag residente sang nasambit nga Barangay nga mga alas 2:00 sang hapon sang Hunyo 30 ang biktima ang nag-abot sa lugar kag nagpangayo sang pagkaon kun sa diin gilayon man nga gintagaan sang kan-on kag sabaw nga ginkaon man sini.
Alas 8:00 sang gab-i sang Hunyo 30, si Alyas Marlon kaupod ang mga abyan sini ang naga-inum sang makahulubog nga ilimnon sa Sari-Sari Store kag nag-abot ang biktima kun sa diin nag-upod man sa pag-inum.
Sang Alas 10:00 sang gab-i sang Hunyo 30 nagpauli na sanday Marlon apang ang biktima ang nagpabilin kag nagpadayon sa pag-inum.
Alas 6:30 kahapon sang aga, nagbukas si Alyas Gerard sang tiyangge nakita sini nga nagahamyangon ang biktima nga wala na sang pangalibutan.
Gilayon nga gindala sa Kabankalan City District Hospital apang gindeklarar nga dead on arrival.
Wala man sang nakita nga sinyales sang struggle antes ginbawian sang kabuhi.
Suno sa Punong Barangay, ang biktima ang wala sang balay kag nagatinir sa VAWC office sang nasambit nga Barangay sa sulod na sang tatlo ka tuig ang biktima kag naobserbahan nga ini nangin alcoholic na samtang may ginainum man nga maintenance ang British National.
