Ginhatagan sang Land Transportation Office-Negros Island Region (LTO NIR) sang 24 ka oras ang driver sang Pickup nga involved sa “gas and go” incident sa isa ka gasoline station sa Brgy Alijis, Bacolod City agud magsurreder sa LTO office ukon sa pinakamalapit nga police station.
Ang lalaki nga nagamaneho sang brown nga Nissan Navarra Pickup nga wala sang plaka ang nagpalagyo matapos magpatughong sang diesel nga fulltank sa balor nga P7, 800 sang Hulyo 17.
Nagpatigayon na sang imbestigasyon ang LTO NIR kaupod ang local law enforcement kag gas station management paagi sa pagreview sang CCTV footage kag pag-track sa brown nga pickup nga involved sa nasambit nga insidente.
Nagpaandam ang LTO-NIR nga kun indi boluntaryo nga magsurrender ang driver sa sulod sang 24 ka oras nga gintalana, magapatigayon ang ahensya sang administratibo kag legal nga mga tikang.
Lakip diri ang permanent revocation sang driver’s license paagi sa administratibo nga proseso, impoundment sang salakyan, active alarm kag apprehend-on-sight-order kag severe penalties kag criminal charges.
