Temporaryo nga nagpondo ang Philippine Coast Guard vessel nga BRP Gabriela Silang sa ciudad sang Bacolod tuga sang pagwaswas sang Bagyo Ulysses sa Luzon.
Suno kay Commander Albert Ferre, commanding officer sang BRP Gabriela Silang, nag-abot ang barko sa ciudad sang Martes agud nga temporaryo nga magpondo tuga sang Storm Signal tuga sang Bagyo Ulysses sa padulungan nga probinsya sang Catanduanes.
Nagtinir man ang barko nga BRP Gabriela Silang sa ciudad sang nagwaswas ang Bagyo Rolly bangod sa augmentation sini sa Southern Visayas District.
Nahibaluan nga ang Gabriela Silang ang isa sa pinakadaku nga vessel sang Philippine Coast Guard.
Bangod naman sa kahalitan sang Bagyo Rolly sa Virac, Catanduanes, gin-recall sang PCG Headquarters ang Gabriela Silang agud nga magtransport sang relief goods gikan sa Department of Social Welfare and Development (DSWD) kag iban pa nga ahensya sang gobyerno.
Nakadangat naman ang mga ini sa Virac, Catanduanes sang Nobyembre 5 kun sa diin nasaksihan ang daku nga kahalitan nga gintuga sang bagyo.
Ang barko ang may karga sadto nga 65 tons sang cargo, samtang gilayon naman nga nagbalik matapos ma-unload ang mga relief goods.
Liwat naman ini kuntani nga magabalik sa Virac, Catanduanes para sa ikaduha nga pagdul-ong sang mga relief goods apang bangod sa malain nga panahon, temporaryo ini nga nagdulog sa ciudad sang Bacolod.
Pahayag naman ni Ferre nga kun mangin maayo na ang panahon subong nga adlaw, liwat naman nga magabyahe ang barko karga ang 74.5 tons nga cargo nga ginalakipan sang 7,500 packs sang mga relief goods kasubong man mga bugas.
