Nagalaom ang pinuno sa Bacolod Traffic Authority Office (BTAO) nga mapatpat na ang ginpasa nila nga proposal sa Bacolod City Council natuhoy sa pagregulate sang mga e-bike.
Sa interview sang Bombo Radyo Bacolod kay BTAO Head Police Major Junji Liba, sakit na sa karun sa ulo ang tuman nga pagduging sang mga e-bike.
Dugang pa sini nga ila man nga natalupangdan nga madamo sa mga driver sang e-bike ang mga senior citizen na.
Suno kay Liba, duha ang ginabutang sang mga ini sa risgo, ang ila pasahero pati na ang ila nga mga kaugalingon.
Paathag sini nga sa masami ang mga e-bike ang nagapatintero man sa mga public jeepneys kag mga pribado nga salakyan, apang aminado ini nga indi na makasarang kun kis-a ang reflexes sang mga katigulangan sa kaangay nga aktibidad.
Suno diri, santo sa desinyo, ang mga e-bike ang ginapahanugutan lamang sa mga interior sang Barangay gani panawagan ni Liba sa mga opisyales sang syudad nga ireview ang ginpasa nila nga proposal agud maregulate ang mga e-bike kag mabuhinan ang nagaluntad nga traffic congestions.
Paathag pa sini nga ang BTAO ang wala sang tinutuyo nga kuhaan sang palangabuhian ang mga ultimo nga drivers apang ginapahanumdom sini nga basi nagapinsar lamang kita sang kaugalingon nga income apang ang atun buluhaton ang nagatuga na sang kahalitan sa iban.
Panugyan man ni Liba nga mapasakaan ang penalty sa violations sang mga e-bike bangod sa karun ang maximum nga penalty ang yara lamang sa P200.
Paathag sini nga ang kaangay nga balor ang sarang lamang nga mabawi sang mga driver sa tatlo ka trip kasunod sang paggawad sang tricycle, gani ang tikang ang indi makabig nga peventive.
Pasalig naman sang BTAO nga kun may-ara na sa mapanaog nga ordinansa, nakahanda ang ila nga ahensya sa pagpatuman.
