Ginpahanumdom sang Bacolod Traffic Authority Office nga kun mahimo malikawan ang mga area nga magapatigayon sang partial road closure sa patigayunon karun sa hapon nga Parade of Lights.
Sa interview sang Bombo Radyo Bacolod kay BTAO deputy head Jose Antonio “Jojo” Robello, umpisa alas-2:00 karun sa hapon magapatigayon sang partial road closure sa Burgos Street halin sa STI-West Negros University.
May 12 ka grupo nga magacompete kag sila ang magaparada labay sa Circumferential Road padulong sa Bacolod City Government Center.
Paathag ni Robello nga parehas lamang ang routa nga labayan sa festival of lights tinalikdan nga tuig.
Suno kay Robello, ang pihak nga lane ang ma-occupy sang magaparada samtang ang duha ka mabilin nga lane ang labayan sang mga salakyan.
Sa tion nga makalab-ot na sa Circumferential Road ang ikog sang parada, pagabuksan naman ang kabug-usan sang dalan Burgos.
Kasubong man ang pagpatuman sa Circumferential Road gani pahanumdom ni Robello nga kun indi lang man kinahanglan nga sa nasambitan nga dalan maglabay, mas maayo nga magreroute na lamang.
Ang parade of lights ang maga-umpisa alas-5:30 sang hapon.
Ginalantaw sini ang pagbug-at sang trapiko halin alas-5:00 sang hapon tubtob alas-8:30 sang gab-i.
Kun indi malikawan ang paglabay sa dalan, mas maayo naman nga tempranuhan ukon matapos na sang event.
Samtang alas-4:00 sang hapon tubtob alas-8:00 sang gab-i naman ang pagpatuman sang truck ban sa circumferential road.
