Nagpangabay ang pinuno sang Bacolod Traffic Authority Office sa mga pumuluyo nga magkooperar sa mando sang Land Transportation Office tuhoy sa pagsuksok sang face shield kun nagasakay sa pampubliko nga transportasyon.
Sa interview sang Bombo Radyo kay BTAO Head Police Lt. Col. Luisito Acebuche, ginpahayag sini nga manakop gid sila sa mga persona nga nagabayolar sa nasambit nga mando bangud ini ang nagikan sa national inter-agency task force against COVID-19.
Suno kay Acebuche, wala sang rason nga may yara pa sang magabayolar bangud malapit 15 ka adlaw nga time frame na ang ginhatag sang BTAO agud makapreparar ang mga pumuluyo.
Suno sa iya, ang driver ang pagahatagan sang penalidad kun madakpan nga may pasahero ini nga wala nagasuksok sang face shield.
P500 ang penalidad sa first offense; P1,000 para sa second offense; kag P1,500 sa third offense kag revocation sang lisensya santo sa city ordinance 35 ni Mayor Evelio “Bing” Leonardia.
Samtang, kun Land Transportation Office naman ang makadakop, P2,000 ang penalidad sa first offense; P3,000 sa second offense; kag P10,000 sa third offense, revocation sang lisensya kag kinahanglan magpaidalum sa seminar.
Nagapangayo man sang pasensya ang pinuno sa mga pumuluyo bangud ila lang ginatuman ang mando sang national government.
Gani nagapangabay nalang si Acebuche sang kooperasyon sa mga pumuluyo agud indi na madakpan kag mamultahan.
