Nagpasalig ang Bacolod Traffic Authority Office nga nagaduty ang mga traffic enforcers sang ciudad bisan manugtapos na ang Leonardia administration kag ginalauman nga magatakop naman ang kontrata sang mga enforcers nga job order casuals sa idalom sang current administration.
Ini ang kasunod sang obserbasyon sang mga Bacolodnon nga narespondehan kuntani ang negosyante nga si Jeffrey Keng Seng sang ini ang gintiro sa intersection sang BS Aquino Drive kag Dalan Lacson sang Martes sang udto kun may nagaduty nga traffic enforcer.
Nahibaluan nga nakamaneho pa si Keng Seng sang Nissan Patrol kag nagdiretso ini sa bakante nga lote sa Barangay 3.
Suno kay Dennis Perma, head sang Administrative Section sang BTAO, may nagaduty nga traffic enforcer sa BS Aquino Drive-Lacson Streets sang natabo ang insidente apang nabatian lang sini ang lupok kag wala nakit-an kun sin-o ang gintiro bangud yara ini sa higad kag nagaandar ang traffic light.
Suno kay Perma, nagaduty ang mga traffic enforcers bangud wala man sila sang sweldo kun sila ang absent.
Apang aminado man si Perma nga may mga enforcers nga indi na adlaw-adlaw kun magduty.
Ang ciudad sang Bacolod ang may yara sang malapit 400 ka traffic enforcers apang 36 lang sa mga ini ang regular employees kag supervisory nalang ang nature sang duty ukon assigned sa isa ka opisina.
Suno kay Perma, nagaduty ang mga traffic enforcers bangud kinahanglan ang manpower sa tunga sang dalan kun magluntad ang brownout.
