Gin-athag man sang pinuno sang Bacolod Traffic Authority Office (BTAO) nga request palang ang nabaton nila nagikan sa construction firm kun sa diin nagahingyo ang mga ini nga siraduhon ang dalan Bonifacio sa Barangay 4, Bacolod City.
Suno kay Police Major Junji Liba, ang contractor ang nagpasa na sa ila sang letter request angot sa road closure apang subject for approval pa ini sang Sangguniang Panlungsod sang Bacolod City.
Suno kay Liba, ang proseso sa tion nga magpasa sang request sang road closure hulaton ang approval sang Sangguniang Panlungsod bangud ini ang ginakonsulta pa sa committee on transportation.
Nahibaluan nga request sang road closure ang ginadiskusyunan pa sa Sangguniang Panlungsod paagi sa committee on transportation kag nagapagwa sang resolutions kun ini ang maaprubahan na.
Apang ang natabo ginsirado na sang contractor ang ginaubra nga dalan sa Barangay 4 kun sa diin nagtuga man sang dako nga huol sa mga motorista ilabi na nga may ginapatuman nga one way scheme sa syudad.
Nagpanugyan man si Liba sa contractor nga indi magmato-mato agud malikawan nga makatuga sang confusions kag pagsalangisag sang mga motorista sa syudad kag ang letter request nga ila nga ginpasa ang subject for approval pa.
Ginpakadtuan man ini sang BTAO head sa traffic supervisor ang dalan nga ginsirado agud nga ipabuksan ini.
