Negatibo sa cholera contamination ang mga bubon sa Purok Laurel sa Bakyas, Mansilingan diri sa ciudad sang Bacolod nga ginpaidalom sa laboratory test matapos nagsufrer sang diarrhea ang isa ka residente sa lugar kag naggwa sa test sang ospital nga ini ang positibo sa cholera.
Sa interview sang Bombo Radyo kay Punong Barangay Rodolfo ‘Boy’ Pico, mahimo nga sa pagkaon nakuha sang pasyente ang bacteria bangud siya man lang isa sa bilog nga panimalay ang nagsufrer sang diarrhea.
Suno kay Pico, indi man makatuga sang infection ang E. Coli bacteria nga nadetect sa tubig bangud tuman man lang ini kadiutay.
Una na nga ginpahayag sang pasyente nga nagkaon ini sang leftover nagikan sa party tinalikdan nga adlaw nga wala nainit.
Suno sa punong barangay, idecontaminate gihapon ang tubig sa bubon bangud nag-abiso man ang Bacolod City Health Office nga mas maayo nga regular ang pagbutang sang chlorine ilabi na nga may suba sa Purok Laurel kag may mga pamalay sa higad sang suba.
Suno kay Pico, indi masiguro nga wala sang higko nga nagailig sa suba bangud sa poso negro sang mga pumuluyo gani mas maayo nga madecontaminate ang tubig sa mga bubon.
Ang mga artesian wells sa Purok Laurel nga ginbutangan sang chlorine ang sarang na magamit kahapon bangud 24 oras man lang ang hulaton matapos ang pagbutang sang chlorine.
