Ginsuguran na ang deliberasyon sa 2027 annual budget sang Bacolod City Government Miyerkules, Nobyembre 11.
Una nga ginpatawag amo ang City Accounting Officer, City Budget Officer, kag Bacolod City Treasurer agud ipaathag kung sa diin kuhaon sang ciudad sang Bacolod ang P650 million nga sobra sa proposed annual budget.
Nagtambong sa deliberasyon sanday Bacolod City Councilor Thaddy Sayson bilang pinuno sang Committee on Finance and Appropriations sa Sangguniang Panlungsod, Councilor Homer Bais, Councilor Wilson Jun Gamboa, Vice Mayor Kalaw Puentevella, Councilor Jason Villarosa, Councilor Al Espino kag Councilor Pao Sy.
Satisfied naman si Councilor Thaddy Sayson sa sabat sang Bacolod City Treasurer kun sa diin kuhaon ang P650 million nga sobra sa proposed annual budget.
Sa interview sang Bombo Radyo Bacolod kay Sayson, ginatun-an sa karun sang city government ang pagpa-auction sang mga propedad nga wala nagabayad sang buwis, bilang kabahin sang mga tikang agod makatipon sang dugang nga pondo para sa ginaduso nga P5.370 billion pesos nga budget sang ciudad sa 2027.
Suno diri, ginalantaw nga maka-generate sang P200 million pesos ang auction sale sang mga propedad nga wala na nabayaran sang buwis.
Dugang pa sang konsehal may yara proposed increases sa regulatory fees nga madugay na nga wala na-update, nga mahimo man makadugang sa kita sang LGU sa 2027.
Ini ang pinakadaku nga budget increase sang syudad kon ipaanggid sa nagligad nga mga tuig.
