Maayo kag produktibo ang paglaragway ni Bacolod City Councilor Atty Renecito Novero sa pagpatigayon nila sang budget hearing sa Bangkok, Thailand.
Sa interview sang Bombo Radyo Bacolod sa konsehal, wala na ini naghatag pa sang iban nga detalye magluwas sa masobra P4 bilion ang ginapropose nga 2025 budget sang ciudad.
Suno diri, ginahatag niya ang kinamatarong sa alkalde sa pagpahat-pahat sa publiko sang natuhoy sa budget.
Apang nagalaom ini nga ang proposed budget ang para sa ika-uswag pa sang ciudad sang Bacolod padulong sa target nga Super City.
Sa budget briefing, ang mga department heads ang ginhatagan man sang tyansa nga mapresent kag madepensahan ang ila nga mga budget proposals.
Ang Sangguniang Panlungsod ang naglatag man sang ila positions kag pila ka argumento.
Sa pihak sini, gin-athag naman ni Novero nga wala sang prohibition sa kun diin magapatigayon sang budget briefing, kaangay sa karun nga ini ang ginpatigayon sa luwas sang pungsod.
Dugang pa sini nga wala man sang gingastos nga kwarta gikan sa kaban sang gobyerno kag lunsay personal money ang ila nga ginpagwa.
Suno kay Novero, wala man sang epekto sa ila official transactions ang pagpatigayon sang budget briefing abroad bangod weekends kag sila ang wala man sang opisina.
Ang mga ini ang magabalik na sa Bacolod City sa Lunes.
