Ginapanindugan sang Alliance of Concerned Teachers nga madamo gihapon sang ginpasulod nga congressional insertion para sa 2026 National Expenditure Program.
Sa interview sang Bombo Radyo Bacolod kay ACT Partylist Representative Antonio Tinio, bilang kabahin sang minority wala sila sang pangamot sa desisyon sa pagbag-o sang liderato sa Kamara.
Madumduman nga nag-abstain si Tinio sa pagbotohay sa pagbulos ni Isabela 6th District Rep. Faustino “Bojie” Dy III kag Leyte 1st District Rep. Ferdinand Martin Romualdez bilang House Speaker.
Suno diri, wala na sang iban pa nga ginnominar nga kandidato sa pwesto para sa smooth transition.
Bantayan naman nila kun may-ara sang mangin pagbag-o sa imbestigasyon karun nga nanaog na si Romualdez agud indi ma-impluwensyahan ang imbestigasyon bangod siya ang gina-link sa budget insertions para sa maanomalya nga flood control projects.
Apang nagakahangawa ini nga amo gihapon ang sitwasyon bangod apisar ginpadula ni President Ferdinand “Bongbong” Marcos Jr ang budget para sa flood control, nagtimbook gihapon ang ginpropose nga budget bangod sa lain naman nga proyekto ang ginpatigayon nga insertion.
Suno diri, sa baylo nga flood control projects, ang bag-o nga mga insertions ang magakadto sa pagtukod sang dalan, taytay kag multi-purpose buildings.
Panindugan ni Tinio nga sa kadakuon sang nabuyagyag, nagalaom ang publiko nga may mapapanabat.
Suno diri, kun sa ulihi wala sang manabat, mahimo magdangat kay Presidente Marcos ang basol bangod siya ang nag-umpisa sang imbestigasyon, bangod magagwa nga acting lamang ang tanan.
