Ginapinsar pa sang Local School Board kag Bacolod City Government nga gamitun na lamang sa pagbakal sang PE uniforms ang P15 million nga budget para sa school supplies sang 72 mil nga estudyente.
Sa interview sang Bombo Radyo Bacolod kay Councilor Al Victor Espino, chairperson sa Committee on Education sa Sangguniang Panlungsod, gin-athag sini nga ang ordinansa nga nagahatag sang P15 million nga budget para sa school supplies ang na-aprubahan walo tubtob napulo ka tuig na ang nakaligad.
Paathag sang konsehal nga tuman na ka dako ang deperensya sa presyo sang mga school supplies.
Sa nakaligad nga Local School Board Meeting upod sa Committee on Education, nga gintambungan ni Bacolod City Mayor Alfredo “Albee” Benitez, ginkunsulta sang alkalde sa Department of Education (DepEd) kun ano ang mga mahimo magamitan sang budget nga matuod nga ginakinahanglan sang estudyante.
Ini bangod ang P15 million nga budget ang P208 na lamang kun tungaon sa 72,000 nga mga estudyante gikan sa Grade 1 tubtob Grade 6.
Suno sa konsehal sang napasar ang resolusyon, 45,000 tubtob 50,000 pa lamang ang mga estudyante kag manubo pa ang presyo sang balaklon gani mas dako ang mabakal gikan sa budget.
Apang sa karun ang P208 ang kulang na kun ibakal sang bag, samtang ang mga notebooks ang nagabili naman sang halos P30.
Suno kay Espino, bangod ang budget ang gikan sa kwarta sang tax payers, ginatinguhaan nila nga matumod kun ano gid ang kinahanglan sang mga estudyante.
Nakaligad nga tuig, ang City Government ang wala naman naghatag sang bag, sa baylo plastic envelope na lamang nga puno sang school supplies, apang sadto nagarange lamang sang P15 ang notebook.
Bangod sa gamay nalang ang maiguan sang kwarta, ginsuhestyon sa meeting nga ibakal na lamang sang PE uniforms ang budget bangod ini ang indi man limitado sa school supplies.
Para naman kay Espino, maayo man nga gamitun ang budget sa repairs sang mga classrooms nga naguba matapos mapabay-an makaligad sang pandemic kasubong man naguba bangod sa mga naglabay nga bagyo.
