Ginpasalig sang project development officer 4 sang City Cooperative and Livelihood Office sang Bacolod City nga gikan pa sa rice mill ukon arocera sa Valladolid ang mga bugas nga ginbaligya sa balor nga P20 kada kilo kag wala na naglabay sa warehouse sang National Food Authority.
Sa interview sang Bombo Radyo Bacolod kay Brenda Bordeus, antes paman ang ceremonial launching sang P20 per kilo rice program sa Burgos Public Market kaina sang aga, nagrepack na sila sang tigpulo ka kilo sang bugas.
Madumduman nga 10 ka kilo lamang sa kada semana ang sarang mabakal sang vulnerable sector nga ginalakipan sang indigents, senior citizen, persons with disability kag solo parents ukon 40 kilos kada bulan.
Suno kay Bordeus, aminado sila nga may magabakal sang kinilo kilo gani magluwas sa una na nga narepack nga 10 ka kilo, may mga sinako man nga mahimo actual nga makilo sa merkado.
Ang P20 kada kilo nga bugas ang sa karun sarang mabakal sa Bacolod Central Market, Burgos Public Market kag Libertad Public Market.
Indi naman derekta makabakal sang cash bangod may-ara sang purchase slip nga mabakal sa Bacolod City Government Center kag ini ang ipresentar sa balaligyaan sa merkado.
Sa masunod nga semana, ginalantaw nga ipanaog naman sa kada Barangay ang programa.
Suno kay Bordeus, sa una nila nga plano, may clustering sa mga barangay kag may area lamang nga baligyaan, apang nadesisyunan ni Bacolod City Mayor Alfredo “Albee” Benitez nga mag-alokar nalang sa kada Barangay agud mas accessible sa tanan.
40 ka sako ang ipadala sa mga numbered barangays samtang 70 ka sako naman sa named barangays, kag dugangan na lamang kun maubos na.
Pasalig naman ni Bordeus nga ang P20 nga bugas ang gikan sa Bago City kag banwa sang Valladolid kag ginpagaling sa rice mill sa Valladolid.
Ini ang mainit pa sang gindeliver sa Bacolod City Government Center, nga pamatuod nga bag-ong galing kag wala na ginhapit pa sa NFA warehouse.
