Nagpagwa sang memorandum order si Governor Eugenio Jose Lacson nga ginamanduan sini ang tanan nga mga local government units subong man ang African Swine Fever Task Force nga dumilian ang pagsulod sang mga buhi nga baboy, pork, pork products kag iban pa nga mga pork related food items nagikan sa Mindanao kasunod sang ASF outbreak sa nasambit nga lugar.
Madumduman nga sang nagligad nga Nobyembre 2019, nag-issue ang gobernador sang isa ka provincial ordinance nga permanente nga naga-dumili pagsulod sang mga buhi nga baboy, pork, kag iban pa nga pork products nagikan sa Luzon nga una na nga gin-igo sang ASF.
Nabutang sa nasambit nga ordinansa nga automatic na nga dumilian ang iban pa nga mga lugar nga maapektuhan sang nasambit nga balatian.
Suno kay Provincial Veterinarian Dr. Renante Decena, nagpagwa sang memorandum order si Lacson para sa mga LGUs kag sa ASF task force agud i-mando nga mas hugton pa gid ang pagbantay sa mga pantalan, airport kag sa mga entry points.
Suno kay Decena, indi gusto sang provincial government nga mabutang sa risgo ang swine industry sa probinsiya bangud madamo ang maapektuhan pananglitan nga maigo sang ASF virus ang Negros Occidental.
