Nagapakig-angot na ang Department of Social Services & Development (DSSD) sa Bacolod City Legal Office sa pagkoordinar sa tag-iya sang abandonado nga building sa 4th Lacson St. nga ginatiniran sang pila ka mga pamilya nga wala sang puluy-an.
Sa interview sang Bombo Radyo Bacolod kay Dr. Richelle Verdeprado-Mangga, head sang Department Of Social Services & Development (DSSD)-Bacolod, humalin sang nagpungko ini sang December 2024 ang una gid sini nga ginhimo amo ang pagpadala sang sulat sa tag-iya sang building.
Suno kay Mangga, gin-eksplikar nila sa nasambit nga sulat nga ang ila nga building ang gina-istaran sang mga kabataan kag pamilya kag nagahimo sang mga aktibidad nga unlawful kag illegal.
Suno diri, ginsaysay man sang katapo sang anti-mendicancy task force nga makapila na nila ka beses ginpasirad-an ang lugar apang ginaguba lamang kag liwat nga ginatiniran.
Dugang pa sini sa ila nga environmental scanning kag profiling ang mga pamilya nga nagatinir sa nasambit nga building ang gin-estorya isa isa.
May bes man nga napagwa nila tanan ang nagatinir sa building kaupod ang police kun sa diin nakita nila ang isa ka bata nga nagahampang kag kaupod man ang amay sini.
Apang matapos ang isa ka semana nagbalik naman ang mga ini sa nasambit nga building nga nangin kabudlayan man sang DSSD.
Nagapasalamat man si Mangga kay Bacolod City Mayor Greg Gasataya nga isa sa mga tikang amo ang matigayon nga mapasirad-an ang nasambit nga building.
May pila ka mga kabataan nga narefer na sang DSSD sa mga social welfare institutions kag gindul-ong sa ila mga pamilya agud nga masiguro ang welfare sang mga kabataan.
Suno kay Mangga, mafollow-up sila sa tag-iya sang building kag mapatawag sang meeting agud nga mapungkuan kag mahimuan sang long term solution ang nasambit nga problema.
