Bisan nagdoble ang presyo subong nga tigkalalag, naubos man ang ginabaligya nga bulak sang mga nagarenta sang flower shop sa likod sang Bacolod Arts and Youth Sports Center.
Sa interview sang Bombo Radyo Bacolod kay Lindsey Salazar, nakabawi sila bangud naubos ang ginbaligya nila kahapon apang nagdugang sila order bangud ginalauman naman nga may mabakal pa subong nga adlaw.
Suno kay Salazar, ang presyo sang bulak kahapon kag subong ang pareho lang man apisar nga ang presyo sang gindeliver nga bulak ang mas mahal kumparar sang gindeliver sang Domingo bangud tuman na kadiutay ang supply.
Suno diri ang presyo sang bulak nga gin-order nagikan sa Dangwa ang nagtriple na ang bili sini.
Ginpahayag man sini nga ang sadto P350 nga bili sang isa ka dosena nga bulak subong P700.
Samtang ang tatlo ka stick sadto ang mabakal sa P100 apang sa karun, ini ang ginabaligya na sa P50 kada stick.
Antes ang pandemya ang isa ka box sang bulak ang mabakal sa P7,000 apang sa karun ini ang mabakal na sa P20,000.
Ginalantaw ni Salazar nga nagtriple ang presyo sang bulak bangud kulang ang supply kag nagdiutay man ang nagatanom sang bulak sa Benguet bangud man sa epekto sang pandemya.
Ginpahayag man sini nga mas ginapili nila nga magkuha sa Benguet sang supply sang bulak bangud mas barato ang makuha nila sa shipping.
