Ginkumpirmar sang Valencia Municipal Police Station nga indi matuod nga bulalakaw ukon meteorite ang kaangay sang kalayo nga madasig man nga nadula nga nakuhaan sang video sa bahin sang Brgy Jawa, Valencia, Negros Oriental.
Madumduman nga naglapta sa social media ang video kun sa diin kaangay nga hinali nga nagkalayo sa bahin sang mga kakahuyan, kag mabatian man ang nagapanic nga tingog sang babayi nga naga-alegar nga ini ang bulalakaw ukon meteorite.
Sa interview sang Bombo Radyo Bacolod kay Police Lt Edsil Enopia, deputy chief of Police sang Valencia Municipal Police Station, sang makita nila ang video gilayon man nila nga ginkadtuan ang lugar kag nagkoordinar sa Bureau of Fire Protection.
Suno diri, ang nakita nga masanag nga pula ang mahimo gikan sa flare nga ginagamit sang mga barko kun may emergency.
Pasalig ni Enopia nga indi dapat magpanic bangod wala sang bulalakaw nga nagtupa sa banwa sang Valencia.
