Posible pa nga madugangan ang bulig pinansyal nga ihatag sa pamilya ni Lorie Alacre, ang overseas Filipino worker nga ginpatay sang Hamas sa Israel.
Sa interview sang Bombo Radyo kay DSWD Region 6 assistant regional director Arwin Razo, nakabaton na sang inisyal nga bulig ang pamilya nga P40,000 kun sa diin P20,000 diri ang para sa educational assistance para sa duha ka hinablos ni Loreta nga naga-eskwela sa kolehiyo, P10,000 para sa food assistance, kag P10,000 para sa utod sini nga solo parent.
Suno diri, posible pa nga madugangan ang bulig pinansyal nga ginhatag sang DSWD Region 6 samtang nagapadayon pa ang ila assessment kasubong man sang iban nga ahensya nga sulod sa paghatag sang bulig sa pamilya.
Dugang pa sini, posible nga mabuligan ang pamilya para sa burial ni Loreta sa tion nga mag-abot na ang bangkay sini sa Pilipinas.
Pahayag ni Razo, nagmando si President Ferdinand Bongbong Marcos Jr nga buligan ang mga pamilya sang mga OFW’s nga napatay sa Israel.
