Tuman ang pagpasalamat sang amay sang triplets sa banwa sang Ilog diri sa Negros Occidental sa tanan nga mga nagpadangat sang bulig paagi sa Bombo Radyo Bacolod para sa mga lapsag nga ginbun-ag nga premature.
Miyerkules sang udto sang gindaho kay Alvin Pundales sang Barangay Canlamay, Ilog ang P7, 500 nga cash, bayo kag iban pa nga kagamitan sang triplets nga sanday Alex, Zander kag Alexander.
Suno kay Pundales, dako gid nga bulig ang ginhatag sang mga anonymous donors para sa mga anak sini.
Sa karun, yara pa sa ospital ang triplets kag sila ang ginamonitor.
Madumduman nga nagpangayo sang bulig ang pamilya sang triplets nga ginbun-ag sa ospital sa Kabankalan City, Negros Occidental.
Suno sa 22-anyos nga amay, ginamonitor sang mga doktor sa Lorenzo Zayco District Hospital ang kahimtangan sang mga lapsag apang ginarekomendar ang mga ini nga ipalantaw ang triplets sa eksperto sa private hospital.
Sa pagbaton sini sang bulig, si Pundales ang gin-updan sang staff sang Ilog Municipal Social Welfare and Development Office.
Nagpanugyan naman ini kay Pundales nga atipanon sang maayo ang triplets bangud panalagsa lamang ang tinion nga makabun-ag sang triplets ang isa ka iloy.
