Ginawelcome sang Bacolod City Water District (BACIWA) ang ginapropose sang gobernador sang probinsya sang Negros Occidental nga bulk water supply paagi sa public private partnership (PPP).
Sa interview sang Bombo Radyo Bacolod kay Mona Dia Jardin, general manager sang BACIWA, nakatambong na ini sa meeting kaupod si Negros Occidental Governor Eugenio Jose “Bong” Lacson kag sang abugado sang probinsya kaupod man ang private company nga maundertake sang proyekto agud istoryahan ang kinahanglanon kag dapat himuon agud nga matigayon ang ginadihon nga proyekto.
Suno kay Jardin, madugay-dugayan pa antes matigayon ang bulk water supply sang probinsya kaupod ang BACIWA bangud kinahanglan pa nga ipreparar ang source sang bulk water supply apisar nga may yara na sang kuhaan sini.
Suno diri, sa karun nagapangayo na lamang sila sang dugang nga data angot sa PPP proposal agud nga masulod naman nila sa ila programa nga ginhimo sa BACIWA kag kun maayo lamang ang presyo, ginawelcome gid nila ini.
