Duha ka beses nga nagbuga sang itom nga aso ang Bulkan Kanlaon kaina sang aga.
Sa interview sang Bombo Radyo Bacolod kay Engr. Marie Endylene Quintia, resident volcanologist sang Phivolcs Kanlaon Volcano observatory, ang degassing sang bulkan ang nakaligad pa nga bulan nag-umpisa.
Narecover alas-5:55 kaina sang aga ang una nga gas emission nga may kaupod nga gray ash ukon abo gani itom ang makita nga ginabuga nga aso sang bulkan, samtang ini ang nasundan pa alas-6:39 kaina sang aga.
Ang ginbuga nga aso ang naglab-ot sa 500 meters ang kataason kag ini ang napalid sa northwestward nga dereksyon.
Gin-athag sini nga ang pagbuga sang aso nga may kaupod nga abo ang tuga sang pressure gikan sa sulod sang bulkan, kun sa diin bangod sa kabaskog sang degassing, naga-upod ang mga magagmay nga particles.
Indi naman tuman ka damol ang nakita nga itom nga aso kag sila ang wala paman sang nabatun nga report sang baho sang asupre ukon ashfall sa mga katupad nga mga banwa kag ciudad.
