Mas malapad nga area sa ciudad sang La Carlota ang naapektohan sa pag-erupt sang bulkan Kanlaon.
Sa pagbyahe sang Bombo News Team sa ciudad sang La Carlota, tuman ka damol sang abo nga nagkaladgdag sa dalan kun sa diin may yara sang bahin nga halos zero visibility na.
Tuman nga naapektohan ang brgy Ara-al, Haguimit, kag La Granja sa ciudad.
Sa interview sang Bombo Radyo Bacolod kay Office of Civil Defense Negros Island Region Director Donato Sermeno III, apektado ang ciudad sang Bago, La Castellana kag La Carlota apang sa ciudad sang Canlaon, Negros Oriental, wala sang maayo nga epekto ang nagluntad nga explosive eruption bangod ang dereksyon sang hangin ang padulong sa Negros Occidental.
Sa karun, sa ciudad sang La Carlota, malapad ang area nga may yara sang ashfall kag nag-untat ang supply sang tubig.
Suno diri, may yara man sang baho sang asupre sang ciudad.
Sa karun, nagakoordinar na ang Local Government Unit sa provincial government para sa pagpadala sang supply sang tubig kag water filtration.
Pahayag ni Sermeno, indi pa man madeklarar nga alert level 4 na ang status sang bulkan bangod ang nagluntad nga eruption ang sulod sa gihapon sa criteria sang alert level 3.
Iya man ginapasalamatan nga wala anay ginpabalik ang mga evacuees ilabi na nga indi mapaktan ang sitwasyon sang bulkan.
