Ginkumpirmar sang science research specialist sang PHIVOLCS Kanlaon Volcano Observatory sa La Carlota City, Negros Occidental nga may yara sang narecord nga ash emission ang Bulkan Kanlaon.
Sa interview sang Bombo Radyo Bacolod kay Pearly Sianson, nagdangat sa 1,500 meters ang kataason sang madamol nga makunsiderar gray ash emission nga ginpagwa sang Bulkan Kanlaon kahapon sang hapon.
Suno kay Siason, pila ka barangay sa ciudad sang Bago ang nakaeksperyensya sang ash fall kalakip na ang Barangay Abuanan, Binubuhan, Dulao, Ilijan, kag Ma-ao.
Ginpahayag man sini nga wala pa sang reported nga may barangay sa ciudad sang La Carlota kag banwa sang La Castellana nga naapektuhan sang ash fall.
Pebrero 6 ang ulihi nga narecord kun sa diin nagpagwa sang maitom nga abo ang Bulkan Kanlaon, ini ang naglinong sa sulod sang pila ka adlaw kag kahapon lang liwat nagpatigayon sang nasambit nga volcanic activity.
Suno diri, padayon ang paghubag sa lawas sang bulkan, clogging ukon pagbara kag degassing gani may yara sang nagaluntad nga mga ash emission kag ini man ang indikasyon nga mahimo nga liwat maglupok ang Bulkan Kanlaon.
Padayon nga ginapaandaman ang publiko nga mag-aligmat sa tanan nga tion ilabi na nga padayon ang mga aktibidad sang Bulkan Kanlaon.
Nagapabilin sa Alert Level 3 ang Bulkan Kanlaon apisar sang iya nga mga ginpatigayon nga minor eruptions.
