Liwat nga nagbuga sang maitom nga aso nga may kaupod nga asupre ang Bulkan Kanlaon alas-11:45 kaina sang udto.
Sa interview sang Bombo Radyo Bacolod kay Mari-Andylene Quintia, resident volcanologist sang Phivolcs Kanlaon Volcano observatory, gin-athag sini nga may nagluntad nga eruption apang ini ang indi explosive kaangay sa natabo sang Diyembre 9.
Kadungan sa nagapadayon nga ash emission ang makadali kag mahinay nga volcanic earthquake.
Ang maitom nga abo ang napalid naman sa naaminhan-nakatungdan nga dereksyon.
Nagpaandam naman ang Phivolcs sa mahimo pagtupa sang ashfall.
Bangod Alert Level 3 gihapon ang status sang bulkan, ginapahanumdom nga nagapabilin man ang tyansa sang pagluntad sang eruption.
Ginakahangaw-an man ang posibilidad nga ang pag-ulan ang makatrigger sang pagluntad sang lahar flow, kun sa diin ang Phivolcs ang una na nga nakapagwa sang Kanlaon Volcano Lahar Hazard Zone.
