Ginkumpirmar sang bise alkalde sa banwa sang La Castellana nga naglupok ang Bulkan Kanlaon, pasado alas-8:00 kagab-i.
Sa interview sang Bombo Radyo Bacolod kay Vice Mayor Rhumyla Mangilimutan nga nagwa ang mga pumuluyo bangud sa nabatian nga mabaskog nga paglupok sa nasambit nga bulkan.
Ang paglupok nabatian pasado alas 8:00 ang takna kagab-i.
Sa karun may amat amat na nga nabatyagan ang ashfall tuga sang paglupok sang Bulkan sa naibabaw nga bahin sang banwa.
Ini ang nagtuga sang eruption plume nga nagataas sang 2000 meters antes nagpadulong sa naaminhan-nasidlangan santo sa narecord sang IP Camera sang Lower Masulog, Canlaon City observation station (VKLM).
Makita ang pyroclastic density currents (PDCs) nga nagpanaog sa 1 km nabatgatnan nga bahin sang summit crater.
Nagapabilin sa Alert Level 2 ang Bulkan Kanlaon.
Nagdugay lamang sang tatlo ka minutos ang minor explosive eruption nga nagluntad sa Bulkan Kanlaon sang Biyernes, alas 8:05 sang gab-i.
Sa interview sang Bombo Radyo kay Philippine Institute of Volcanology and Seismology Director Teresito Bacolcol, nagdugay lamang sang tatlo ka minutos ang eruption kag nagdangat sa 2,000 meters high gani ini ang makabig lamang nga minor explosive eruption.
Suno kay Bacolcol, sang natapos ang eruption alas 8:08 sang gab-i, wala na ini nasundan pa.
Sa karun nagapabilin sa Alert Level 2 ang bulkan kag dako ang posibilidad nga indi ini pag-ipasaka sa Alert Level 3 bangud suno kay Bacolcol, ila na nacalibrate ang eruption.
Wala naman nila ginadula ang posibilidad nga may magluntad pa nga masunod nga mga eruption.
Nagapanugyan ang Phivolcs sa mga pumuluyo nga maghalong kag mangin alerto.
