Bisan nagkanay-kanay na ang aso nga nagagwa sa baba sang Bulkan Kanlaon, wala pa ginpapauli ang mga evacuees nagikan sa Barangay Pula, Masulog, Lumapao, kag Malaiba sang Canlaon City kag iban nga banwa diri sa Negros Occidental.
Sa karon, nagapabilin sa gihapon nga Alert Level 2 ang status sang Bulkan Kanlaon.
Suno sa Philippine Institute of Volcanology and Seismology (Phivolcs), posibe gihapon nga magluntad ang isa pa ka eruption bisan kalmado ini kahapon.
Suno kay Mariton Bornas, chief science research specialist sang Phivolcs, nagaluntad gihapon ang degassing sa Bulkan Kanlaon kag ini ang nagaproduce sang weak low-frequency volcanic earthquakes tubtub kahapon apang mahimo nga mag-alburuto naman ini nga wala sang anuman nga patimaan.
Sa pihak nga bahin, madamo naman sang apektado nga mga mangunguma matapos nga nalaya kag nagkalamatay ang ila mga pananom bangod sa abo gikan sa bulkan.
Samtang, may yara man sang naglain ang pamatyag bangod sa baho sang asupre.
Nagpasalig naman si Department of Social Welfare and Development (DSWD) Secretary Rex Gatchalian nga wala sang dapat nga kabalak-an bangod nga handa ang gobyerno nga magbulig sa mga apektado.
Suno diri, handa ang ahensya sang DSWD para magbulig kag magrespond para sa mga pumuluyo.
Samtang sa statement naman ni Negros Oriental Governor Manuel “Chaco” Sagarbarria, ang provincial government ang natalana na gid man nga allocation para sa dos mil nga mga farmers, gani target na sini nga ang Canlaon City ang unahon.
Ini ang separado pa sa assistance nga ihatag may kaangtanan sa epekto sang paglupok sang Bulkan Kanlaon.
Suno sang gobernador sila ang nagdeploy sang lima ka mini dump truck para sa pagpatigayon sang evacuation.
Ginapakamaayo man sini nga may District Hospital sa Canlaon City, kag may-ara naman sang nakastandby nga ambulansya.
Pasalig sini nga may napreparar nga foodpacks ang DSWD kasubong man ang provincial government.
Suno diri, yara pa sa State of Calamity ang Negros Oriental bangod sa El Niño, gani mahapos sa ila ang paggamit sang pondo.
Ini ang nagrequest na sang 100 nga gas mask kag gintransfer ang pila ka oxegyn tank sa Canlaon District Hospital.
