Liwat nga nagluntad ang Moderately Explosive Eruption sa Bulkan Kanlaon.
Sa interview sang Bombo Radyo Bacolod kay Daryl Aro, resident volcanologist sang Phivolcs Kanlaon Volcano Observatory, nag-umpisa ang paglupok alas-12:46 sang udto, kag naglawig tubtob alas-12:48.
Santo sa eruption signal ini ang 255 pascals ukon kaparehas sang intensity sa July eruption, apang mas mabaskog gihapon ang paglupok sang Disyembre 2024.
Nagapabilin sa gihapon sa Alert Level 2 ang status sang Bulkan.
Suno kay Aro, ginamonitor pa nila ang iban pa nga parameters.
Ini bangod luwas sa seismic signals, kalakip man sa ginakonsiderar sa pagdeklarar sang status ang inflation ukon deflation sa surface sang bulkan, kasubong man ang pagsaka ukon panaog sang sulfur dioxide emission.
Ang hangin ang padulong sa Northeast Direction ukon padulong sa Canlaon City, Negros Oriental, nga ginalantaw mahimo tup-an sang ashfall.
Panawagan ni Aro nga likawan ang pagsulod sa 4km Permanent Danger Zone sang Bulkan Kanlaon.
Luwas diri, ginpasugat naman sang Punong Barangay sa Brgy Biak-na-bato, La Castellana, Negros Occidental sa mga Barangay Tanod ang mga mangunguma sa sulod sang 4km radius nga ginpahanugutan nga makasulod para sa pag-amuma sang pananom.
Suno kay Aro, delikado kun masundan pa ang paglupok kun may kaupod nga pyroclastic density current.
Panugyan sini sa mga pumuluyo nga indi nalang anay maggwa sa balay kun indi kinahanglan, bangod sa ashfall, ukon magsuksok sang facemask.
