Ginkumpirmar sang resident volcanologist sang PHIVOLCS Kanlaon Volcano Observatory – La Carlota Station nga may yara sila sang namonitor nga ashing ukon pagbuga sang abo sa Bulkan Kanlaon.
Sa interview sang Bombo Radyo Bacolod ka Mari-Andylene Quintia, nagdangat sa 700 metros ang kataason sang “ashing event” nga namonitor nila gikan sa Bulkan Kanlaon sang tinalikdan nga adlaw.
Suno kay Quintia kahapon ang ashfall ang yara sa nabagatnan-nasidlangan nga direksyon nga nag-apektado sa Barangay Masulogi, Canlaon City, Negros Occidental.
Suno kay Quintia kahapon wala sang narecord nga Local Government Unit sa Negros Occidental nga naapektuhan sang ashfall.
Ginpahayag man sini nga ila nanotisyaran nga humalin pa sang Sabado sang aga madamol ang aso nga ginapagwa sang Bulkan Kanlaon apang indi sagunson kundi lang-at lang-at ukon occasional lamang.
Ginabantayan sa karun sang PHIVOLCS kun may yara nga upod nga fresh deposits gikan sa Bulkan Kanlaon ang mga ashfalls.
Bangud sini nagpatigayon ang PHIVOLCS sang ash sampling test agud nga mahibaluan kun ang abo ang nagikan sa fresh material ukon old material sang Bulkan.
Suno diri padayon ang degassing kag ashing bangud may pressure sa hydrothermal system sang bulkan ang gani padayon man ang pagsungaw sini nga may dala nga sulfur dioxide kag iban pa.
Nagapabilin sa Alert Level 2 ang Bulkan Kanlaon kag ginaabisuhan ang mga pumuluyo malapit sa lugar nga ginadumilian ang pagsulod sa 4km permanent danger zone.
