Ginpahayag sang punong barangay sang Barangay Biak na bato sa banwa sang La Castellana, Negros Occidental nga mataas sa gihapon nga abo ang ginbuga sang Bulkan Kanlaon kahapon.
Kahapon pasado alas 7:00 sang aga, nagpost ang isa ka digital creator nga wala na nagbuga sang aso ang bulkan.
Una na nga ginpahayag sang resident volcanologist sang Phivolcs Kanlaon Volcano observatory nga ginabantayan ang gulpyada nga pagnubo sang ginabuga nga sulfur dioxide sang bulkan Kanlaon nga patimaan nga ini ang malupok.
Sa interview sang Bombo Radyo Bacolod kay Punong Barangay Joselito Martinez, padayon man ang aktibidad sang Bulkan Kanlaon kun sa diin may tion nga mahina ang pagbuga sang abo apang may yara nga mataas, kaangay kahapon nga makita mismo sa Barangay Bi-ak na Bato.
Suno kay Martinez, ginpang-evacuate na ang yara sa 6km radius extended danged zone sang Bulkan Kanlaon.
Suno diri, ang nasambit nga barangay ang may yara sang masobra sa 1,100 ka mga individuals nga nagapabilin sa duha ka evacuation center.
Ginpahayag man sini nga maayo man ang sitwasyon sang mga pumuluyo sa evacuation center kag ang probinsya, banwa kag ang barangay mismo ang nagabuligay para sa pagkaon kag kinahanglanon sang mga evacuees.
Ginapangabay man sini nga indi na maglupok liwat ang bulkan bangud dako nga bahin sang Barangay Biak na Bato ang maapektuhan.
Samtang ang mga balay sang mga evacuees ang ginasiguro man nga wala sang may malain nga tinutuyo nga makasulod bangud man sa nagaroving nga mga Barangay Tanod.
Panugyan ni Martinez sa tanan nga mga pumuluyo sang Barangay Biak na Bato nga magpamati sa tanan nga abiso sang mga otoridad para sa ila nga safety ilabi na nga indi mapaktan ang aktibidad sang bulkan.
