Mahimo nga magdangat sa pagpasaka sang kaso ang bullying nga nagakatabo sa sulod sang buluthuan kun indi mahatagan sang tikang.
Madumduman nga may isa ka estudyante sa Barangay Bata ang naglumpat gikan sa apat ka panalgan nga school building matapos maka-eksperyensya sang bullying.
Sa interview sang Bombo Radyo kay PCapt Rosalino Pugoy, tagpamaba sang Bacolod City Police Office, may tion nga may nagapablotter sa mga estasyon angot sa bullying apang nagpahanumdom ini nga sa mga buluthuan may yara sang mandato sa pag-address sa ini nga isyu.
Suno diri, sa buluthuan pa lamang mahimo na nga mapaidalom sa detention, suspension ukon expulsion ang nagapangbully.
Apang mahimo man nga maglab-ot sa pagpasaka sang kaso kun may natabo na nga pagpanakit.
Pahayag ni Pugoy, may salabton ang mga buluthuan kun indi mapabay-an ang problema sa bullying kag nagpahanumdom ini sa mga ginikanan nga ipa-intindi nga indi magpangbully.
